Президент жаңы ипподромго жер бөлүп, ордуна ипотека үйлөрүн курууну сунуштады
“Мамлекет башчысы ипподромду кыдырып, анын учурдагы абалын көрүп чыкты. Садыр Жапаров заманбап жаңы ипподром куруу үчүн жер тилкесин бөлүп берүү боюнча сунуш киргизүүнү, ошондой эле учурдагы ипподромду бузуп, анын ордуна калкка жеңилдетилген ипотекалык насыя менен берилчү көп кабат үйлөрдү салуу мүмкүнчүлүгүн кароону тапшырды”.
Улуттук оюндардын түрлөрү боюнча мелдештер өтүүчү, үч миң орундуу «Ак-Кула» ат майданы 1947-курулган. Мэрия анын жалпы аянты 57,4 гектар, 1,6 гектары боюнча соттук териштирүүлөр жүргөнүн, ипподром авариялык абалда, адамдар үчүн кооптуу экенин, техникалык абалы нормаларга жооп бербей калганын билдирип келет.
Ал жерге футбол стадиону салынары тууралуу да сөздөр тарап, мэрия андай маалыматты четке каккан жана жаңысын куруу үчүн кеминде 70 миллион доллар инвестиция сала ала турган инвесторду издөө караштырылып жатканан билдирген. (RK)