Британија ќе одговори „без двоумење“ на труењето на рускиот шпион
Британската министерка за внатрешни работи Амбер Рад денеска оцени дека нападот со нервен отров врз поранешниот руски шпион и неговата ќерка е „дрзок и неразумен чин“ на кој ќе биде „одговорено без двоумење“ кога ќе се разјаснат сите факти.
Таа во парламентот изјави дека „огромни ресурси“ се насочени во пронаоѓањето на одговорните за труењето на Сергеј Скрипал и неговата ќерка Јулија. Тие беа пронајдени без свест на клупа во градот Солзбери, што доведе до антитерористичка истрага. Скрипал и неговата ќерка се во тешка, но стабилна состојба, рече британската министерка.
Полицијата одбива да шпекулира кој би можел да биде напаѓачот. Руската влада отфрли каква било вмешаност.
Скрипал бил полковник во руската воена разузнавачка служба(ГРУ), а во 2006 година бил осуден за шпионажа во корист на Британија. Беше ослободен во 2010 година и разменет за руски шпиони уапсени во САД.
Случајот потсетува на убиството на Александар Литвиненко, кој исто така беше поранешен руски шпион. Тој беше отруен во Лондон во 2006 година со радиоактивен полониум.