Шчербак - Мит е дека НАТО ќе и донесе мир и стабилност на Македонија
Рускиот амбасадор Олег Шчербак говорејќи пред студентите од Факултетот за безбедност порача дека секоја држава има сопствен избор за градење на националната безбедност, без разлика дали тоа е со членство во НАТО или воена неутралност. Тврдењата дека членството во НАТО на Македонија ќе и донесат мир и стабилност, тој ги оцени како мит.
Според него, секоја земја треба самостојно со референдум и почитување на волјата на мнозинството да одлучи за членство во сојузи. Тој посочи дека постои пропаганда со која Русија се претставува како агресор и дека земјите од Балканот се принудуваат да направат вештачки избор меѓу Истокот и Западот.
Шчербак тврдењата дека Македонија се наоѓа на линија на огнот меѓу САД и Русија ги оцени дека се во насока на изолација на двата народи и зголемување на русофобијата.
„Руската Федерација не може да не биде загрижена за воената доктрина на НАТО во која Русија е прогласена за непријателска. Тоа е многу опасна игра и не би сакале во оваа авантура да ја вовлечат и Македонија. Македонскиот народ да се користи како топовско месо и нејзината територија како НАТО база“, изјави Шчербак.