Коѕијас: Добив 800 писма со смртни закани, куршуми и кутии со крв

Министерот за надворешни работи на Грција, Никос Коѕијас, во интервју за грчкото радио „Њуз247“ откри дека добил огромен број смртни закани за него и за неговото семејство, куршуми и кутии полни со крв и земја натопена со крв и многу закани, откако почнале преговорите со Македонија за името.

Шефот на грчката дипломатија во интервјуто за радиото вели дека говорот на омраза во Грција конечно треба да престане.

„Имам добиено 800 писма со закани за мојот живот и на моето семејство. Имам добиено кутии полни со крв и ми велат ќе има крв од моето семејство. И кутии со почва полеана со крв. Имам добиено различни големини на куршуми. Каде е обвинителот? Овде немаме само клевета, овде имаме кривични дела што стигнуваат до злосторство. Исто како и со обидите, владата или министрите од владата, да не ја извршат нивната должност според нивен избор како што одредува Уставот, туку врз основа на уцени и закани. Ова се тешки злосторства, според грчките закони, за кои не гледам некој да реагира“, рече Коѕијас во интервјуто и додаде дека ги нашол и имињата и адресите и телефонските броеви на луѓето што телефонски му се заканувале, но, обвинителот не реагирал со апсење. 

Осумстоте писма за кои говореше Коѕијас ѝ се непознати на јавноста, со оглед на тоа дека од почетокот на интензивните преговори со Македонија досега, грчките медиуми објавија за само две заканувачки писма со куршуми до шефот на грчката дипломатија, со пораки „да не го отстапи името Македонија“.