Помпео ги отфрли обвинувањата од Северна Кореја за „гангстерско“ однесување
Американскиот државен секретар Мајк Помпео ги отфрли обвинувањата од Северна Кореја за „гангстерско“ однесување и рече дека санкциите ќе останат на сила додека Пјонгјанг не го исполни ветувањето на лидерот Ким Џонг Ун за ослободување од нуклеарното оружје. По средбите со неговите колеги од Јапонија и од Јужна Кореја во Токио, Помпео денеска рече дека санкциите ќе останат во сила до целосно верифицирање на денуклеаризацијата договорена меѓу претседателот Доналд Трамп и севернокорејскиот лидер Ким Џонг Ун.
Северна Кореја претходно ги обвини САД за поставување барања во „гангстерски стил“.
Портпаролот на севернокорејското Министерство за надворешни работи, по вчерашната посета на Помпео на Пјонгјанг го критикуваше пристапот на американскиот државен секретар во разговорите.
Таа изјава е контрадикторна со изјавите на Помпео кој по разговорите во Пјонгјанг рече дека двете страни постигнале напредок за „речиси сите централни прашања“.