Сведочења за насилствата во Собранието на 27 април
Дудуш во судницата рече дека се сеќава оти на 27 април бил во галеријата на прес-салата во Парламентот, кога влегле поголема група на демонстранти кои извикувале „ќе бидете убиени.“ Тој рече дека надвор од прес-салата го препознал Игор Дурловски. На прашање на обвинителот Еленко Миланов каде го видел Дурловски, Дудуш рече дека го видел пред салата каде што се одвивало насилството и дека кога се симнувал по скалите пред да биде евакуиран, три лица го нападнале, а според него Дурловски ги навел на тоа, но оти не може да тврди со сигурност.
Новинарката Душица Мрѓа рече дека во Собранието била од 11 часот и дека по обраќањето на Зоран Заев се вжештила атмосферата, бидејќи најавил дека ќе биде избран Талат Џафери за претседател на Парламентот, а во прес-центарот гледале во живо како поголема толпа влегуваат во Собранието. Кога влегла толпата, според неа, целта им била Зоран Заев, Талат Џафери и Зијадин Села, им се заканувале дека ќе ги убијат, дека се предавници. Таа рече дека кога состојбата ескалирала, почнало да се удира по секого, дури и по новинарите и оти забележала како Села излегува сам и како го опколиле повеќе луѓе и почнале да го тепаат.
На денешното рочиште треба да сведочат и Агим Нухиу, Сашо Тасевски и Владимир Трајков. За случувањата во Собранието на 27 април 2017 година обвинети се 33 лица, од кои 31 за терористичко загрозување на уставниот поредок, а две лица за помагање на делото.