Голем удар за владејачката партија во Полска на локалните избори

Владејачката популистичка полска партија на Правото и правдата доживеа сериозен удар во вториот круг на локалните избори, зашто проекциите на резултатите покажуваат дека не успеа да освои ниеден од големите градови. Конечните резултати од вчерашните избори се очекуваат денеска, но комбинацијата од излезните анкети и парцијалните резултати покажуваат дека владејачката партија ќе освои само шест градоначалнички места од 107 општини, наведува новинската агенција Асошиејтед прес. Најголемиот од тие градови е Земошќ со околу 65 илјади жители.


Според проекциите, проевропската коалиција предводена од Граѓанската платформа треба да освои 28 градови, додека во поголемиот број општини победиле независни кандидати.


Синоќа беше објавено дека опозициската коалиција победила во трката за градоначалник на Краков и на Гдањск, додека во првиот круг на 21 октомври ги освои Варшава, Познањ и Лоѓ.


Резултатите од локалните избори покажуваат длабока поделеност во Полска меѓу градовите, кои се либерални упоришта на опозицијата и конзервативните селски средини, кои се наклонети на владејачката партија, која често е во конфликт со ЕУ и е обвинувана дека со земјата владее авторитарно.


Владејачките конзервативци на изборите за регионални парламенти пред две недели освоија 34 отсто од гласовите, додека опозициската коалиција освои 28 отсто.