Шекеринска во Париз - Француска поддршка за Македонија за НАТО и ЕУ
Министерката за одбрана и македонска вицепремиерка Радмила Шекеринска имала средба со нејзината француска колешка Флоранс Парли, на која Франција ѝ дала на Македонија поддршка за спроведувањето на Преспанскиот договор и членството во НАТО, соопшти македонското Министерство за одбрана.
Оваа официјална средба меѓу министри за одбрана на Македонија и на Франција е прва по една деценија.
„Мојата влада вложи многу во процесот на зачленување во НАТО. Покажавме резултати во домашните реформи, вклучително и на план на одбраната, но и се зафативме со отворените билатерални прашања“, рече Шекеринска.
Според соопштението од Министерството за одбрана, француската министерка Парли го поздравила напредокот во земјата и рекла дека Франција ја поддржува Македонија на патот кон полноправно членство во НАТО. Таа го оценила договорот со Грција како голем пресврт во односите во регионот и ги повикала чинителите од двете страни да го поддржат и да дозволат негова целосна имплементација.