Мицотакис ги повика партиите и пратениците да гласаат против Договорот од Преспа

Претседателот на најголемата грчка опозициска партија, Кирјакос Мицотакис, уште еднаш повтори дека Нова демократија нема да гласа за ратификација на Договорот од Преспа и повика истото да го сторат и другите партии и пратеници, јави дописничката на МИА од Атина.

„Постои само еден начин да го ограничиме опсегот на националната штета: Договорот од Преспа да не се ратификува во грчкиот Парламент. Повторувам на најкатегоричен начин: Нова демократија ќе гласа против договорот и ги повикуваме сите партии и сите пратеници да го сторат истото. Впрочем, ова е барањето на големото мнозинство грчки граѓани“, вели Мицотакис.

Причина за денешната изјава на лидерот на Нова демократија се текстовите објавени во грчките медиуми, кои повикувајќи се на vecer.mk и mkd.mk пренесуваат изјава на македонскиот премиер во која тој вели дека „со Договорот од Преспа се отвора можност македонскиот јазик да се изучува во Грција“.

„Изјавите на Заев за изучување на македонски јазик во Грција се неприфатливи. Но, беа очекувани од самата содржина на договорот. На најјасен начин го потврдуваат она што Нова демократија го кажа од прв момент, дека признавањето на наводен македонски јазик и националност, ја отвора Пандорината кутија за оживување на сите историски неточни иредентистички барања на Скопје“, вели Мицотакис и додава дека Заев има секаква причина да слави за она што е договорено, но „Ципрас останува безгласен пред резултатите на неговата политика“.