Тројца мртви во самоубиствен напад во Иран
Најмалку тројца луѓе загинаа, од кои двајца полицајци, а десетици се ранети во самоубиствен напад во Иран, информираат тамошните власти. Автомобил-бомба експлодирал пред полициска станица во градот Чабахар во југоисточен Иран. Според полицијата, во нападот учествувал повеќе од еден човек. Тие со возилото се обиделе да влезат во дворот на полициската станица, но биле спречени од чуварите, по што ја детонирале бомбата. Иранската државна телевизија објави дека имало престрелка по детонацијата.
Чабахар е главното пристаниште во Оманскиот Залив и е на околу 100 километри западно од границата со Пакистан. Во регионот Систан-Балучистан има големо сунитско малцинство во претежно шиитскиот Иран.
Самоубиствените напади се ретки во Иран.