Кина бара ослободување на директорката на Хуавеи

Кина од Канада бара итно ослободување на финансиската директорка на кинескиот технолошки гигант Хуавеи, Менг Ванжоу, која беше уапсена и се соочува со екстрадиција во САД под обвинение за навод обид за заобиколување на американските санкции против Иран. Таа е заменик претседавач на управниот одбор на Хуавеи и е ќерка на основачот на компанијата Рен Женгфеи, кој е поранешен кинески воен инженер.

Дел од аналитичарите велат дека нејзиното апсење ќе ги засили тензиите меѓу Пекинг и Вашингтон, кои веќе се напнати по меѓусебното воведување извозни тарифи.

Рускиот министер за надворешни работи Сергеј Лавров рече дека нејзиното апсење е пример на „арогантната“ американска надворешна политика и покажува дека Вашингтон ги наметнува своите закони и таму каде што нема јурисдикција.

Хуавеи е најголемиот производител на мрежна опрема во светот, која се користи од телефонски и интернет компании.

Американските разузнавачи ја обвинија компанијата дека служи како параван за шпионирање од кинеската армија и од разузнавачките служби.

Вашингтон повторно воведе санкции против Иран, откако САД во мај соопштија дека се повлекуваат од нуклеарниот договор меѓу Техеран и светските сили од 2015 година.