Американски воени бродови поминаа низ Тајванскиот Теснец

Два американски воени брода вчера поминаа низ Тајванскиот Теснец, што е прва таква операција оваа година, соопшти тајванската влада. На ова во Тајван веројатно се гледа како на знак на поддршка од владата на американскиот претседател Доналд Трамп во време на засилени тензии меѓу Тајван и Кина.


Пекинг го смета Тајван за дел од Кина и не ја исклучува можноста од употреба на сила за да го стави под своја контрола.


САД лани три пати испратија воени бродови да поминат низ теснецот што ги разделува Кина и островот. И покрај технолошкиот напредок на кинеската воена технологија, што претставува зголемена закана за американските воени бродови, американската морнарица соопшти дека не исклучува испраќање носач на авиони низ теснецот, нешто што не се случило повеќе од 10 години.


Портпаролката на кинеското Министерство за надворешни работи Хуа Чунјинг рече дека Пекинг внимателно ги следи американските бродови низ теснецот и „изрази загриженост“, повикувајќи ги САД да го почитуваат принципот „една Кина“.


Кина го засили притисокот врз Тајван откако Цар Инг-вен од владејачката пронезависна партија беше избран за претседател во 2016 година. Кина редовно испраќа воени авиони и бродови да кружат околу островот и изведува воени вежби во негова близина.


САД го признаваат принципот „една Кина“ и немаат официјални односи со Тајван, но со закон се обврзани да му помогнат на островот да се брани.