Кина ги оцени забелешките на Сорос како бесмислени
Портпаролката на кинеското Министерство за надворешни работи Хуа Чунјинг денеска рече дека Сорос „ги помешал доброто и погрешното“ и оти неговата бесмислена изјава не заслужува да ѝ се одговори.
„Во денешниот свет јасно е кој ги отвора вратите и гради патишта, а кој ги затвора вратите и гради ѕидови“, рече таа.
Сорос вчера, на маргините на Светскиот економски форум во Давос рече дека кинескиот високо технолошки авторитарен режим претставува закана за слободните општества.
Кина создава најсовремен систем за препознавање лица за да ги држи своите граѓани под постојан надзор, а Сорос тврди дека алгоритмите ќе може да пресметаат колку опасна закана може да биде поединецот за режимот.
Фондацијата Отворено општество на Сорос е под постојан напад од десничарските популисти во последните години.
Минатиот месец, унгарската влада на премиерот Виктор Орбан го принуди Централноевропскиот универзитет на Сорос да се пресели од Будимпешта во Виена.