Шекеринска на прв состанок на земјите од НАТО: Нашата татковина е подготвена
Нашата татковина беше партнер на Алијансата долги години и во тие години покажавме дека сме доверливи, посветени и флексибилни. Како полноправен член, Алијансата може да смета на нас како способни и подготвени да дадеме придонес кон колективната мисија за заштита и одбрана на нашите заеднички демократски вредности, рече денеска министерката за одбрана Радмила Шекеринска пред министрите за одбрана на земјите-членки на НАТО, за време на првото наше учество на официјалниот состанок на министрите одбрана на Северноатлантскиот совет на НАТО.
Шекеринска посочи дека одбранбениот буџет е во пораст, согласно насоките од Алијансата за издвојување на два проценти од бруто-домашниот производ, а дека сме и во фаза на имплементација на Стратегискиот одбранбен преглед. Таа додаде дека Армијата е посветена да биде проактивен дел од структурите и мисиите на Алијансата и дека се во тек реформите за развој на интероперабилни воени сили, како дел од најуспешната одбранбена алијанса
во светот.