Администрацијата на Трамп предлага кратење на буџетот на РСЕ
Буџетот на Радио Слободна Европа ќе биде намален од 124 милиони долари, колку што изнесуваше оваа година на 87 милиони долари за наредната година. Се предвидува и укниување на сервисите во Грузија, Татар Башкир и Северен Кавказ, како и прекинување на програмата на црногорскиот и македонскиот сервис кои се дел од Балканскиот сервис.
„Во минатата година Радио Слободна Европа достигна неделна публика од 34 милиони луѓе на интернет, телевизија и радио, што е за 30 проценти повеќе од претходната година. Ова е показател за растечката потреба за објективно новинарство во Русија, Иран, Пакистан, и сите земји кои се цел на РСЕ“, изјави в.д. претседател Дејзи Синделар.
Радио Слободна Европа во моментов е присутна во 22 земји и на 26 јазици. Нејзината мисија е да обезбеди обејктивно и професионално известување во земјите со ограничени медиуми. Гласот на Америка, Радио Слободна Азија и други ентитети исто така е предвидено да ги намалат трошоците.
Предлог буџетот на Трамп е најголемиот во историјата на САД и во кој се предвидени трошоци од 4,7 билиони, меѓу кои и 750 милијарди долари за трошоци во одбраната и 8,6 милијарди долари за изградба на физичка бариера на границата меѓу САД и Мексико. Во него се предвидува и 1,9 милијарди кратења во социјални програми и здравствена заштита.
Предлог буџетот сега ќе биде испратен до Конгресот, кој ја носи крајната одлука. Во оваа година, Конгресот одобри 124 милиони долари за Радио Слободна Европа, иако администрацијата на претседателот предложи 91 милиони долари.
„Предлог буџетот за 2020 година е првиот чекор во долг процес. Иако критичари во некои земји можеби сакаат да си одиме, ние со нетрпение очекуваме да продолжиме со нашата работа од витално значење“, порача Синделар.