Хан: ЕК ќе препорача преговори со Северна Македонија и Албанија
Еврокомесарот за проширување и соседска политика Јоханес Хан изрази увереност дека Европската комисија кон крајот на мај ќе препорача отворање на преговорите со Северна Македонија и со Албанија. Во интервју за „Ханделсблат“, Хан вели дека препораката ќе биде донесена врз основа на критериумите заеднички договорени од страна на земјите во ЕУ. Хан нагласува дека Скопје и Тирана го заслужија отворањето на преговорите, што беше одложено во јуни минатата година. „Историскиот договор за ставање крај на спорот за името со Грција и договорот за пријателство со Бугарија се охрабрувачки сигнали до целиот регион дека се можни решенија за долготрајните спорови. Северна Македонија исто така постигна добар напредок кога станува збор за внатрешните реформи. Земјата заслужува зелено светло за почеток на пристапните преговори што е можно порано – пред летната пауза“, изјави Хан.