Новости за 22.03.2019

Неделникот Капитал пишува дека власта и опозицијата ќе мора да се договорат за јавното обвинителство, Фокус пишува за амнестиите, а Глобус ја анализира споредбата на Мицкоски на пресудите за 27 април со Нирнбершкиот процес.

Власта и опозицијата не се договорија за СЈО на денешната куса средба. ВМРО-ДПМНЕ бара да им се прифатат забелешките, власта, пак, вели дека забелешките не им биле конкретни.

Тихомир Поп Асановиќ, еден од најдобрите европски клавијатуристи и некогашен член на легендарни постави ТАЈМ и СЕПТЕМБЕР, со реобјавувањето на култните албуми „Мајко земјо“ и „ПОП“ и новиот „Враќање на првата љубов“, на голема врата се врати на регионалната музичка сцена.

Повеќе луѓе сметаат дека ќе бидат заобиколени од социјалната пензија поради условите кои ги предвидува, а дополнително ги разочара висината од 6 илјади денари која ги потсетува на социјална помош. Се проценува дека со мерката ќе бидат опфатени над 3 илајди луѓе кои живеат во апсолутна сиромаштија.

Многу новинари досега по разни основи добивале безбедносни сертификати, но во моментов ниту еден новинар нема важечки безбедносен сертификат, велат од Дирекцијата за безбедносни класифицирани информации за РСЕ. Но, не кажуваат кои и колку новинари имале таков сертификат досега.

Британската премиерка Тереза Мај ја поздрави одлуката на Европската унија да го одложи Брегзитот. Притоа таа оцени дека пратениците во британскиот парламент сега имаат јасни одлуки пред себе.

Финансирањето на партиите, евентуалното незаконско користење на буџетските средства и човечки ресурси во кампањата, ќе биде во фокус на Антикорупциската комисија пред изборите. Мешањето на државата од партијата е главен предизвик и пред овој изборен циклус, велат упатените

Европската унија и понуди на Британија одлагање на Брегзитот, односно излегување на земјата од Унијата до мај, наместо порано договорениот термин 29 овој месец. Унијата со ова, како што наведуваат новинските агенции, и даваат шанса на премиерката Тереза Меј да постигне договор во британскиот парламент за Брегзитот. Со тоа само делумно и се излегува во пресрет на Меј која побара одлагање на Брегзитот до средината на мај.

Во Македонија ќе биде сончево со мала до умерена облачност. Ќе дува слаб до умерен ветер од северeн правец. Утринската температура ќе се движи од -1 до 9 степени, а дневната од 10 до 21 степен. Во Скопје и околината слично време. Утринската температура ќе биде околу 3. А дневната ќе достигне до 19 степени.