Новости за 04.02.2020

Премиерот на Косово Албин Курти изјави по преземањето на должноста претседател на владата дека се отвора ново поглавие на Косово и оти било остварено она што било невозможно. „Ни движењето Самоопределување, ни Демократскиот сојуз на Косово не победија. Победија граѓаните. Сите сме заменливи. Од денеска јас ќе бидам премиер на сите, без оглед на тоа како сте гласале“, рече Курти, ветувајќи дека завршува стариот начин на водење политика. Новата влада на Косово беше изгласана во парламентот неколку месеци по изборите... Читать дальше...

Кинеските власти признаа дека имаат проблеми во одговорот на смртоносниот коронавирус и оти бројот на починати изнесува 425 луѓе. Во истовреме пораснал и бројот на инфицираните и сега има над 20.000. Епидемијата што во минатата недела ја прогласи Светската здравствена организација се верува дека се појавила во декември на пазарот за диви животни во Вухан. Дваесет и три земји досега пријавија околу 150 потврдени случаи на заразени со коронавирусот.

Претседателот Стево Пендаровски денеска ќе престојува во официјална посета на Република Полска. Во Варшава, Пендаровски со највисоки државни и воени почести, како што е најавено, ќе биде пречекан од претседателот на Република Полска, Анджеј Дуда, а ќе има и билатерални средби со маршалот на Сејмот, Елжбијета Витек, и со маршалот на Сенатот, Томаж Гроцки. Предвидено е претседателот Пендаровски да оствари средба со истакнати слависти и македонисти, кои живеат и работат во Полска. За време на официјалната посета на Република Полска... Читать дальше...

Американскиот претседател Доналд Трамп денеска треба да го одржи неговото обраќање во Конгресот за состојбата на нацијата. Тоа ќе биде последно обраќање во неговиот сегашен четиригодишен мандат. Претседателот Трамп изјави дека сака да го одржи обраќањето иако трае судењето за негов импичмент, наведувајќи дека тоа е „многу важно за она што го работи“. Се очекува тој повторно да повика на обединување на нацијата. Инаку судскиот процес за негов импичмент започна на 21 јануари.

Светската здравствена организација соопшти дека работи деноноќно со гигантите на социјалните медиуми за борбата против дезинформациите околу смртоносниот коронавирус. Нивното ширење, како што е наведно, им нанесува големи штети, не само во борбата против инфекцијата, туку и во економската сфера.

Американската Демократска партија ги почна повеќемесечните внатрепартиски избори на кои ќе биде определен нејзиниот претседателски кандидат кој ќе му се спротивстави на претседателот Доналд Трамп. Во трката за изборите на 3 ноември годинава останаа уште 11 политичари, а за фаворити важат поранешниот потпретседател на САД, 77- годишниот Џозеф Бајден, 78 годишниот сенатор од Вермонт Берни Сандерс, сенаторката од Масачусетс, 70- годишната Елизабет Ворен и 38- годишниот Пит Бутиџиџ. Внатрепартиските избори почнаа во Ајова и ќе траат до 6 јуни... Читать дальше...

Ќе биде сончево со мала до умерена облачност и со умерен, во западните делови повремено засилен југозападен ветер. Во вечерните часови почнувајќи од север облачноста ќе се зголеми, ќе почне да дува засилен северен ветер и ќе има врнежи од дожд, кои во текот на ноќта ќе преминуваат во снег. Утринската температура ќе биде од минус три до три, а дневната од девет до 20 степени. Во Скопје и околината слично време. Утринската температура ќе биде околу еден, а дневната ќе достигне до 16 степени.