Шведска обвини Ирачанец за шпионирање за Иран
Шведското обвинителство подигнало обвинение против Ирачанец кој наводно шпионирал за Иран, со тоа што собирал информации за ирански Арапи кои се бегалци во Шведска, Белгија и Холандија.
Обвинителството соопшти дека човекот, чиј идентитет не се открива, собирал информации за иранските Арапи и ги давал на Иран, преправајќи се дека е новинар од арапски медиуми.
Според Обвинителството тој бил активен четири години, се до февруари годинава, а прибавувал и информации од форуми на интернет, кои ги користеле приврзаници на опозицијата.
Тој наводно комуницирал со агенти на иранската разузнавача служба и лично и преку интернет.
Обвинетиот за шпионирање има ирачко и шведско државјанство, уапсен е на 27 февруари, а од 1 март се наоѓа во притвор.
Судењето ќе се одвива од 19 ноември до 11 декември зад затворени врати. Осомничениот ги отфла обвинувањата.
Иран е обвинет за дискриминација и гонење на арапското етничко малцинство во провинцијата Кузустан.