Иран планира да збогатува ураниум до 20 проценти
Агенцијата на ОН со седиште во Виена вчера соопшти дека Иран ова го соопштил во писмо до нив.
„Иран ја информира Агенцијата дека ќе се придржува со законот кој неодамна го донесе нивниот парламент, Организацијата за атомска енергија на Иран да го збогатува ураниумот до 20 проценти“, соопшти МААЕ.
Зариф го повика Бајден САД да ги укинат санкциите за Иран
Нема информација кога ќе почне збогатувањето.
Иран сега збогатува ураниум до 4,5 проценти, што е повеќе од границата од 3,67 проценти утврдена со нуклеарниот договор од 2015 година, но многу под 90 проценти, која се смета за потребна за нуклеарно оружје.
Збогатувањето до 20 проценти ќе го скрати времето на Иран до потенцијално нуклеарно оружје, ако донесе политичка одлука да се обиде да произведе бомба.
Иран постепено се повлекува од обврските од договорот, откако САД еднострано се повлекоа од договореното во 2018 година и почнаа да воведуваат жестоки санкции против Техеран.
По убиството на врвниот нуклеарен научник Мохсен Фахризадех на 27 ноември, иранскиот парламент донесе контроверзен закон кој наредува итно збогатување на ураниум до 20 проценти и окончување на инспекциите од МААЕ.
Владата предводена од претседателот Хасан Рохани се спротивстави на законот, велејќи дека е штетен за дипломатските напори и оти не се издвојуваат средства за негово спроведување.
Некои аналитичари сметаат дека Иран ќе го искористи овој потег на парламентот за да добие предност во идни разговори со САД.
Иранскиот безбедносен апарат под удар по атентатот врз нуклеарниот научник
Останатите потписнички на договорот – Кина, Франција, Германија, Русија и Велика Британија, на 21 декември изјавија дека се подготвуваат за можно враќање на САД во договорот, откако новоизбраниот претседател Џо Бајден ќе ја преземе функцијата на 20 јануари. Бајден рече дека ќе се обиде да се врати во договорот кој беше потпишан додека тој беше потпретседател на претседателот Барак Обама.
Бајден навести дека САД повторно ќе се вратат на договорот доколку Иран се придржува до него, оставајќи ги другите прашања кои предизвикуваат загриженост, како иранските балистички ракети и поддршката за регионални организации да се уредат со други договори.
Иран вели дека неговата ракетна програма и регионалната политика не се „на маса“ и соопшти дека ќе се врати на почитување на договорот веднаш откако САД и трите европски земји-потписнички ги исполнат нивните обврски од договорот за економски олеснувања за Техеран.
Иран постојано негира дека се обидува да произведе нуклеарно оружје, велејќи дека нуклеарната програма е строго за цивилни цели.