Борисов: Хероите да не спојат, оти идните генерации нема да ни простат
Борисов и Османи утрово имале средба на аеродромот во Софија, од каде македонскиот министер заминал за Швајцарија.
Како што објави денеска бугарската агенција БГНЕС, Борисов рекол дека не треба да се одлага македонскиот и албанскиот пат кон Европската унија (ЕУ) и затоа Македонија и Бугарија мора да најдат решение преку преговори со разум, а не со емоции. Според бугаркста агенција, која се повикува на информациите од бугарската Влада, Борисов му рекол на Османи дека мора да се најде решение, оти „следните генерации нема да ни простат“.
Борисов на средбата повторно нагласил дека треба да се исполнат сите обврски од Договорот за пријателство, добрососедство и соработка, потпишан во 2017 година и испратил „посебен поздрав до премиерот Зоран Заев и претседателот Стево Пендаровски“.
Бугарија лани во декември стави вето на преговарачката рамка на Македонија и ЕУ, повикувајќи се на тоа дека Скопје не го исполнува Договорот за добрососедство, но, инсистира и на признавање на бугарски корени на македонскиот идентитет и јазик, нешто што според премиерот Заев, е македонска црвена линија и „за тоа нема преговори“.
Министерот Османи денеска објави дека е во работна посета на Швајцарија и Шпанија, и дека имал средба со Борисов на аеродромот, но не кажа детали за тоа што разговарале со бугарскиот премиер пред летот за Швајцарија. Тој вчера на прес-конференција изјави дека решавањето на спорните прашања со соседна Бугарија не се издигнати како услов на Европската Унија за отпочнување на преговори за членство.