Обвинение за агент за недвижности за измама со продажба на станови

Основното јавно обвинителство поднесе обвинение за агент за недвижности на возраст од 41 година, поради измама со продажба на станови во Скопје.

„Обвинетиот, во периодот од 6 мај 2020 година до 5 март 2021 година, во Скопје, со умисла извршил десет временски поврзани дејствија што претставуваат повеќекратно остварување на исто дело, искористувајќи ист траен однос, исти прилики и слични околности, а со намера за себе да прибави противправна имотна корист. Тој довел и држел во заблуда десет лица – оштетени, на кои лажно им прикажувал факти дека како агент за недвижности во своја Агенција за недвижности е овластен од име на сопствениците на станови да ги продава нивните станови на други лица. Обвинетиот ги огласувал становите и ги покажувал за продажба, со што ги навел оштетените да сторат штета на својот имот од поголема вредност“, се наведува во соопштението на Јавното Обвинителство.

Според обвинителството, обвинетиот со четворица од оштетените склучувал Договори за капар за станови во градба и наплатувал различни износи, но до Договори за купопродажба не дошло.

Со шестмина оштетени, обвинетиот склучувал Договори за капар и наплатувал различни износи за капарот, а потоа склучувал и Договори за купопродажба, во кои без знаење на вистинските сопственици се потпишувал како „продавач“.