Заев, Димитров и Османи утре на средби во Софија
Премиерот Зоран Заев, придружуван од заменик претседателот на Владата, Никола Димитров и од министерот за надворешни работи Бујар Османи утре ќе остварат работна посета на Софија. Според соопштението на владината прес-служба, целта на посетата е интензивирање на напорите за наоѓање решенија за отворените прашања и за деблокада на европската интеграција на Северна Македонија.
Премиерот и владината делегација, според соопштението, ќе остварат работни средби со бугарскиот претседател и премиер, Румен Радев и Стефан Јанев, како и со претставници на поголемите политички партии во земјата.
Средба Заев-Радев: Отворените прашања да бидат решени низ дијалог
Заев на НАТО Самитот 2021 во Брисел пред два дена оствари средба со Радев, на која во фокусот беше „перспективата за постигнување на реален исчекор во процесот на европската интеграција на Северна Македонија. На средбата беше договорена и посетата на Софија.
На 23 јуни треба да се одржи самит на ЕУ на кој ќе се разгледува можноста за почеток на преговорите на Северна Македонија и Албанија, во услови кога членката на блокот Бугарија го блокира почнувањето на процесот со Северна Македонија.