НАТО: КФОР ќе игра клучна улога во спроведување на договорот Белград-Приштина

НАТО го поздрави вчерашниот договор меѓу Белград и Приштина за деескалација и понатамошни чекори за решавање на кризата во северно Косово, наведувајќи дека мисијата на КФОР ќе игра фундаментална улога во обезбедувањето на нејзина ефикасна имплементација. Портпаролот на Алијансата, Оана Лунгеску изјави дека дијалогот меѓу Белград и Приштина, со посредство на специјалниот претставник на ЕУ, Мирослав Лајчак, е од клучно значење за стабилноста во целиот регион. „Ова е единствениот начин да се постигне траен политички договор за регионот“, додаде Лунгеску која изјави дека генералниот секретар на НАТО Јенс Столтенберг разговарал со српскиот претседател Александар Вучиќ и косовскиот премиер Албин Курти претходните денови за потребата од деескалација, воздржаност и враќање на дијалогот.


Србија и Косово се договорија за намалување на тензиите, КФОР останува на границата


По дводневните преговори во Брисел, Белград и Приштина вчера постигнаа договор за решавање на кризата во северно Косово. Договорот предвидува специјалните единици на косовската полиција да се повлечат од премините Јариње и Брњак на 2 октомври, а во исто време да бидат отстранети барикадите на косовските Срби. КФОР ќе ги распореди своите сили на премините Јариње и Брњак пред почетокот на истовремената акција и ќе остане таму две недели.


Тензиите во северно Косово преку фотографии


Кризата во северно Косово започна на 20 септември, кога владата во Приштина испрати специјални полициски сили во Јариње и Брњак за да ја спроведат одлуката за замена на српските регистарски таблички, на што Србите во северно Косово одговорија со блокирање на патиштата.