Црногорскиот премиер во прва официјална посета на Србија

Црногорскиот премиер Здравко Кривокапиќ ќе престојува во прва официјална посета на Белград, каде што ќе разговара со државниот врв на Србија. Неговата дводневна посета е по покана од премиерката на Србија Ана Брнабиќ. За време на посетата на Белград, Кривокапиќ, како што им изјави за новинарите, нема да го потпише Основниот договор со Српската православна црква (СПЦ). Тој додаде дека овој договор треба да биде потпишан во Црна Гора. Посетата е можност да се истакне важноста на стабилен и безбеден регион, како и важноста од неговата посилна интеграција преку механизмот на Берлинскиот процес, кој ја зајакнува европската перспектива на Западен Балкан, се вели во Платформата усвоена од црногорската влада во пресрет на посетата на Кривокашиќ.


Два дена по Цетиње, средба на Вучиќ со патријархот Порфириј


Инциденти во Цетиње во пресрет на устоличувањето на Јоаникиј


„Со оглед на кризата предизвикана од пандемијата на корона вирусот, посетата ќе биде одлична можност да се разговара за моделите насочени кон надминување на здравствените, економските и другите предизвици наметнати од пандемијата со кои се соочуваат двете земји“, се додава во платформата. Како што се посочува, посебен акцент ќе биде ставен врз зајакнувањето на економските врски и соработката, за што има значителни потенцијали. Според документот, за време на посетата ќе биде пренесена црногорската поддршка за новата фаза од преговорите меѓу Белград и Приштина „со очекување таа да се интензивира во наредниот период и да резултира со заемно прифатливо и сеопфатно решение“.