Реакција на Пендаровски за загриженоста на бугарското МНР
Ниту една постапка на македонскиот претседател Стево Пендаровски, ниту досега била, ниту отсега ќе биде во спротивност со Договорот за пријателство, добрососедство и соработка меѓу двете држави од 2017 година, вклучувајќи ја и средбата со здруженија на граѓани од Република Бугарија. Ова е реакцијата од Кабинетот на претседателот по соопштението од Министерството за надворешни работи на Република Бугарија во кое се изразува загриженост за постапките на Пендаровски по неговата средба со претставници на ОМО „Пирин“ од Бугарија.
„Претседателот Пендаровски смета дека секоја институција во двете држави треба да даде свој придонес во надминувањето на отворените прашања и во таа насока е посветен за зајакнување на дијалогот и целосна имплементација на договорот за пријателство, добрососедство и соработка“, нагласуваат од Кабинетот на Пендаровски.
Бугарското МНР загрижено од постапките на Пендаровски
Бугарското МНР во сопштение, изрази загриженост „за последните случувања во Република Северна Македонија, поврзани со постапки на функционери кои изнесуваат негативни ставови во јавноста и кои се во спротивност со позитивната клима создадена од активните напори на владите на Бугарија и Северна Македонија“.
„Неколку дена по успешната заедничка средба на владите на двете земји, повторно сме сведоци на зголемување на тензиите во јавноста предизвикани од конкретни постапки на претседателот на Северна Македонија, кој се обидува да ги обнови темите кои се во спротивност со Договорот за пријателство, добрососедство и соработка од 2017 година. Ваквите дејствија не придонесуваат за изнаоѓање решенија за политички прашања во насока на забрзување на процесот на европска интеграција на Северна Македонија и на меѓусебна доверба, се вели во соопштението од бугарското МНР.
Пендаровски се сретна со претставници на македонските здруженија од Бугарија
Пендаровски вчера во неговиот кабинет прими претставници на ОМО „Илинден“ и претставници на неколку други здруженија на граѓани од Република Бугарија кои го информираа за нивната работа и активности во областа на човековите права, промовирање на толеранција и градење на граѓанско општество.