СДСМ по признанијата во „Титаник“ бара оставка од неколку пратеници на ВМРО-ДПМНЕ
По признанието на високи партиски функционери во судскиот случај „Титаник“ треба да следуваат оставки на сите актуелни пратеници од ВМРО-ДПМНЕ кои биле дел од раководството на оваа партија во тоа време, рече денеска пратеничката на СДСМ Снежана Калеска Ванчева.
„Има пратеници од актуелниот пратенички состав на ВМРО-ДПМНЕ директно поврзани со тоа време и тоа раководство. Александар Николовски, Антонијо Милошоски, Владо Мисајловски, Игор Јанушев се пратеници од ВМРО-ДПМНЕ, блиски соработници на Никола Груевски во време кога се кршеле законите, се злоупотребувале парите на граѓаните, се вршело поткуп при гласање и други изборни нерегуларности.По признанијата на нивните сопартијци, овие пратеници треба да се повлечат од политиката и да преземат морална одговорност“, рече пратеничката од СДСМ.
Јанкулоска, Јанакиески и Протуѓер признаа вина за „Титаник“
На 11 февруари дел од обвинетите во случајот „Титаник“, кој се однесува на изборни нерегуларности и злоупотреби, признаа вина. Меѓу оние кои се изјаснија како виновни се поранешната министерка за внатрешни работи Гордана Јанкулоска, екс министерот за транспорт и врски Миле Јанакиески, поранешната заменичка министерка за права Билјана Бришковска-Бошковска и Мартин Протуѓер, шеф на кабинетот на поранешниот премиер Никола Груевски, кој исто така е обвинет во овој предмет, но е во бегство во Будимпешта.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
Стефанова побара поблаги казни за оние кои признаа вина за „Титаник“
Обвинителката во случајот Лиле Стефановска побара поблаги казни за оние кои признаа вина.