За Бошњачки демократски сојуз резултатите од пописот се неприфатливи

Партијата Бошњачки демократски сојуз реагира на податоците од пописот на населението. За нив како што наведуваат во партиското соопштение, резултатите се неприфатливи, оти како што велат, постојано работат на терен и ја знаат реалната состојба.  Од партијата имаат примедба за пристапот на попишување и се уверени дека бројот на Бошњаци кои живеат надвор од територијата на Р. С.Македонија е далеку поголем.

Од вкупното резидентно население во земјава 58,4 проценти од населението се изјасниле како Македонци, а 24,3 како етнички Албанци, 3,86 проценти како Турци, потоа 2,53 проценти како Роми, како Власи се изјасниле 0,47, како Срби 1, 3 отсто и 0, 87 проценти како Бошњаци.

Од партијата велат дека  јавно укажале на пропустите и се заканиле со излегување од владејачката коалиција, но потоа биле уверувани дека пописот ќе се спроведе коректно и во согласност со сите правила.

„За жал резултатите не го покажуваат тоа и не ја одразуваат реалноста. Затоа, укажуваме дека податоците од пописот фрлаат сенка врз работењето на државните институции и ја доведуваат во прашање функционалноста и довербата во истите“, велат од Бошњачки демократски сојуз.

Македонија изгуби две Куманова меѓу два пописа

Тие бараат да се преиспитаат резултатите од пописот, за да не служат, како што наведуваат, за поткусурување на партиските интереси.

Во земјава не беше спроведен попи речиси 20 години. Пописот 2021 се спроведе во септември лани.