Тетовските советници суспендираа ДУП кој предвидува згради, а граѓаните бараат парк

Советот на Општина Тетово, денеска донесе одлука за суспензија на детален урбанистички план (ДУП) за урбаниот блок 57А, кој е еден од четирите блока на кои граѓанската иницијатива „Тетово сака парк“ бара создавање прв градски парк.


Овој ДУП беше донесен во време на претходното градско раководство, на местото на Шумарско-индустрискиот комбинат (ШИК) „Јелак“ каде се предвидени да се градат десетици згради за домување и трговски центри.


За одлуката да се донесе суспензија на овој ДУП гласаа 16 советници, додека 12 беа воздржани, а немаше никој против.



Зградите го „изедоа“ зеленилото


„Согласно одлуката за суспензија беше донесена и одлука за отпочнување на постапка за изменување и дополнување на ДУП за урабниот блок 57А. Сега следи ревидирање на процесот. Со оваа одлука Тетово се спасува од задушување на згради без критериуми, без паркови и зеленило“, изјави градоначалникот Биљал Касами.


Од иницијативата „Тетово сака парк“ алармираа дека Тетово е единствената општина без градски парк, по што направија конкретен план за ваков парк од 16 хектари.


Тој се простира на 4 урбани блокови, од кои два веќе имаат намена „Д“ односно спорт и рекреација, но на двата останати, меѓу кои и 57А, се планирани згради и лесна индустрија.