Радев смета дека францускиот предлог е чекор во вистинската насока
Предлогот на француското претседателство е чекор во вистинската насока, но остануваат голем број прашања кои треба да се разјаснат пред да биде укинато ветото, изјави денеска бугарскиот претседател Румен Радев коментирајќи го францускиот предлог за укинување на бугарското вето за Македонија.
Тој упати критики до бугарскиот премиер Кирил Петков, кој вчера изјави дека нема да се носи никаква одлука надвор од бугарското собрание. Таму деновиве се работи во тензична атмосфера, откако од владината коалиција излезе партијата „Има таков народ“, со што Петков го загуби парламентарното мнозинство.
Францускиот предлог стигна во бугарскиот Парламент, Скопје засега молчи
„Кабинетот на Кирил Петков никогаш не успеа да изработи бугарски предлог за спорното прашање со Република Северна Македонија, а сега го поднесува францускиот предлог, префрлајќи се во Народното собрание без да каже став. Не може Петков да поднесува туѓи предлози без свое мислење - тој не е курир, туку премиер“, рече Радев пред новинарите.
Ќе „профитира“ ли Македонија од превирањата во бугарската влада
Радев кој во повеќе наврати изјавуваше дека се противи на кревањето на бугарското вето за Македонија, ги повтори темите како внесување на Бугарите во Уставот, јасни механизми за искоренување на дебугаризацијата, кражба и фалсификување на бугарската историја, реставрација на споменици, зачувување на бугарското културно и историско наследство, компензација за жртвите и репресираните што се нарекуваат Бугари.
Притоа ја повика владата да ги разјасни овие прашања, да бара гаранции и да ги брани бугарските интереси.
Петков - Во францускиот предлог ќе има гаранции за Бугарите во Северна Македонија
Францускиот предлог во врска со кревањето на бугарското вето за почеток на пристапните преговори на Северна Македонија со ЕУ, вчера беше испратен до Комисијата за надворешна политика на бугарското Национално собрание.
Според она што го пренесуваат медиумите во двете земји, Франција, која во моментов претседава со Советот на ЕУ, предлага условите на Бугарија за Северна Македонија да бидат вклучени во преговарачката рамка на земјата за пристапување во Европската унија, а дека ЕУ треба да го гарантира нивното спроведување.