ССМ бара веднаш зголемување на платите
Претседателот на Сојузот на синдикатите на Македонија (ССМ) Дарко Димовски денеска изјави дека ќе опстојат на барањето за итно линеарно зголемување на платите од 2.806 денари за секој работник.
ССМ утрово го продолжи генералниот штрајк во јавниот сектор со блокада на влезот во Скопје, кај Автокоманда. Блокадата траеше од 7 до 10 часот, а беа пропуштани само возила на итна медицинска помош, полиција, армија и пожарна.
„Македонскиот работник веќе не може да ги издржи ценовните шокови, енергетската и нафтената криза. Централната и локалната власт да издејствуваат веднаш зголемување на платите, апелира Димовски.
ССМ бара од 1 јули работниците да добијат 2.806 денари поголема плата, а бараат и вработените во јавниот сектор да добиваат К-15.
И натаму останува во сила одлуката за генерален штрајк, вработените во јавниот сектор ќе бидат на своите работни места, но нема да извршуваат работни задачи, освен 10 проценти од вработените кои ќе бидат на располагање за потребите на граѓаните.
ССМ најави дека штрајкот ќе продолжи и со други форми на синдикален притисок, а незадоволството на работниците ќе го изразат и на улица.
ССМ започна генерален штрајк на 22 јуни.