Македонскиот весник „Илинден“ стана дел од Алијансата за етички медиуми на Албанија
Македонскиот весник „Илинден“ стана дел од платформата Алијанса за етички медиуми на Албанија (АЕМ) како прв ваков весник на македонското малцинство во Албанија.
Како што појасни Никола Ѓурѓај, главен и одговорен уредник, АЕМ ги штити своите членки од не фер притисоци и напади, како доброволна група албански медиуми посветени на строго спроведување на етичкиот кодекс на новинарите.
Ѓурѓај - Се зголемува антимакедонската кампања на Бугарија во Албанија
Весникот „Илинден“, првпат излезе од печат во февруари 2011 година во Тирана, а во изминатите 11 години отпечатени се 53 негови изданија. Ова е единствениот македонски весник во Република Албанија што излегува во печатена и електронска форма. Тој објавува информации на македонски јазик, за Македонците во Албанија, Македонија, Балканот, Европа и светот.
„Се стремиме да има стандарди на објективно, истражувачко, аналитичко новинарство, објективна презентација на информациите и нивните извори, како и квалитет и креативност во креирањето на вестите“, појаснува уредникот Ѓурѓај.