На Пакистан ќе му требаат повеќе од 10 милијарди долари за санирање на штетите од поплавите
На Пакистан ќе му требаат повеќе од 10 милијарди долари за санирање на штетите предизвикани од поплавите предизвикани од монсунските дождови и за обнова на оштетената инфраструктура, изјави денеска министерот за планирање и развој Ахсан Икбал. „Нанесена е огромна штета на инфраструктурата, особено во секторите за телекомуникации, патишта, земјоделство и егзистенција“, изјави тој. Најмалку 1.136 лица загинаа од јуни, поплавите однесоа голем број домови и уништија земјоделско земјиште.
Пакистан бара помош за справување со поплавите
Третина од Пакистан моментално е „под вода“, рече министерката за климатски промени Шери Реман, нарекувајќи ја „криза од незамисливи размери“. Во Пакистан во тек е акција за давање помош на ранливите и меѓународната помош полека почнува да пристигнува. Пакистанските власти го припишуваат разорното време на ефектите од климатските промени и тврдат дека Пакистан ги трпи последиците од неодговорните еколошки практики во другите делови на светот.