Судот го одби Жан Митрев, темата „Нечиста крв“ е од јавен интерес
Граѓанскиот суд Скопје го одби барањето на докторот и сопственик на приватна болница Жан Митрев за отстранување на документарниот филм „Нечиста крв“, истражување на ИРЛ, како и барањето на новинарите на ИРЛ да им биде забрането да известуваат за него и за начинот на лекување на пациенти со ковид, се додека неговата тужба за клевета и навреда не добие судска разрешница.
Барањата на Митрев се одбиени како неосновани.
Според Судот, истражувањето за начинот на лекување на ковид пациентите е тема од јавен интерес и новинарите не смеат да бидат замолчени да известуваат.
Граѓанскиот суд му укажува на доктор Жан Митрев дека тој во тужбата се претставува како еден од најпознатите македонски кардиохирурзи и човек со импозантна биографија, кој врши дејност од јавен интерес и поради тоа мора да прифати заинтересираност на новинарите за неговата работа.
Клиниката Жан Митрев и докторот Жан Митрев минатата недела поднесоа тужба за клевета и навреда кон редакцијата на ИРЛ и новинарите автори на истражувањето „Нечиста крв” придружена со предлог за издавање на времена мерка која вклучува бришење на објавите и забрана за дополнително известување додека трае судскиот спор.
На таквото барање реагираа Здружението на новинари и Синдикатот на медиумски работници и апелираа Судот да не го прифати барањето на Митрев.
Од скопското Обвинителство на 5 октомври соопштија дека Жан Митрев дал гаранција од еден милион евра во кеш во Основниот Кривичен суд во Скопје дека нема да избега од државата.
Судот му го одзеде пасошот на Жан Митрев
Против Митрев е отворена истрага под сомнение за измама на пациенти.
Поради опасност од бегство во август му беше одземен пасошот.
Обвинители, здравствени инспектори и претставници од Агенцијата за лекови почнаа да ја истражуваат работата на приватната клиника „Жан Митрев“, по документарниот филм „Нечиста крв“ , во кој откриваат дека Клиниката на кардиохирургот вршела клинички студии на пациенти со методот на хемофилтрација без да ги пријави, а воедно се истражуваат и смртни случаи, поврзани со бактериски инфекции кај пациенти.