Словенија избра жена за претседател на државата

Независната центристичка адвокатка и бранителка на човековите права Наташа Пирц Мусар победи во вториот круг на претседателските избори во Словенија, кои се одржаа на 13 ноември и стана првата жена претседател на Словенија.

Таа го победи противкандидатот, конзервативецот Анже Логар. Во првиот круг од претседателските избори пред три недели, Логар доби најмногу гласови.

Новата претседателка ќе го замени Борут Пахор, кој е активен политички повеќе од 30 години.

Нејзината прва задача ќе биде да го премости длабокиот јаз во земјата, во која живеат 2 милиони жители.

Од речиси сите преброени гласови, Пирц Мусар го победи Анже Логар со 54 наспроти 46 проценти. Нејзината победа го зајакнува либералниот блок во земјата по победата на левичарската коалиција на парламентарните избори во Словенија во април.

Педесет и четиригодишната Пирц Мусар ќе биде првата жена што ќе ја извршува функцијата претседател откако Словенија стана независна во време на распадот на Југославија во 1991 година. Овие претседателски избори се седми во историјата на независната држава.

Словенците избираат претседател – Поранешниот шеф на дипломатијата или адвокатката која ја застапуваше Меланија Трамп

Новата претседателка на Словенија е поранешна новинарка и адвокатка за заштита на лични податоци, кој исто така ја застапуваше поранешната прва дама на САД, Меланија Трамп. Таа се залага за човекови права, владеење на правото и прашања од социјалната заштита.