Иран почна да збогатува ураниум до 60 проценти чистота

Иран почна да збогатува ураниум до 60 проценти чистота во Институтот Фордоу, објавија денеска државните медиуми.

Збогатувањето од 60 отсто е под потребните 90 отсто за производство на оружје, но значително повеќе од 20 отсто кои беа произведени пред договорот од 2015 година.

„Во писмо до Меѓународната агенција за атомска енергија (МААЕ), Иран објави дека почнал да збогатува ураниум до 60 проценти чистота на локацијата Фордоу со помош на напредни центрифуги ИР-6“, објави полуофицијалната новинска агенција иСина.

Фордоу е ирански институт за збогатување ураниум.

Одборот на МААЕ од 35 земји во четвртокот усвои резолуција со која на Иран му се наложува итно да соработува со истрагата за трагите од ураниум пронајдени на три неодредени локации, изјавија дипломатите на гласањето зад затворени врати.

Официјалната новинска агенција Фарс објави дека Техеран исто така во Фордоу започнал процес на „замена на центарот од првата генерација (ИР-1) со напредни ИР-6“.

Нуклеарниот пакт од 2015 година меѓу Иран и шесте светски сили му дозволува на Иран да ја користи само првата генерација центрифуга ИР-1, но откако американскиот претседател Доналд Трамп се повлече од договорот во 2018 година, Иран продолжи да збогатува ураниум.

Резолуцијата на МААЕ е втора оваа година насочена кон Иран поради истрагата, која стана камен на сопнување во разговорите за заживување на нуклеарниот договор од 2015 година.

Иранското Министерство за надворешни работи во понеделникот ја отфрли резолуцијата како „политички мотивирана“. 

Индиректните разговори меѓу Техеран и американската администрација на Џо Бајден за заживување на договорот од 2015 година се во застој од септември, при што двете страни бараат поголема флексибилност.