Реконструкцијата на Владата влегува во трета недела
Собраниската седница на која се расправа за реконструкција на Владата влегува во третата работна недела. Пратениците на 27 февруари ќе ја продолжат расправата за Предлогот за избор на членови на Владата да бидат Кренар Лога, за министер за правда, Фатмир Меџити, за министер за здравство, Азир Алиу за министер за информатичко општество и Каја Шукова, министер за животна средина.
Во петокот расправата за избор на новите министри беше прекината во вечерните часови, а претседателот на Собранието најави дека таа ќе продолжи денеска напладне.
Расправата за изборот на новите министри продолжува, откако по десетдневна дебата беа разрешени министрите од Алтернатива, за здравство Беким Сали, за информатичко општество и администрација Адмирим Алити и министерот без ресор за дијаспора Џемаил Чупи.
На 104. седница по изборот на министрите треба да се расправа и гласа за разрешување на пет заменици министри и да бидат именувани нови.
Реконструкцијата уследи откако на владината коалиција и се приклучи партијата Алијанса за Албанците, а потоа од Владата си замина Алтернатива. И двете партии се од албанскиот блок на политички партии во Македонија.