ОН: Несреќата во Либија можеше да се избегне

Шефот на Светската метеоролошка организација на Обединетите Нации, Петри Таалас, рече дека бројните смртни случаи во разорните поплави во Либија можеле да се избегнат.

Во разговор со новинарите, Таалас рече дека земјата можела да издаде предупредувања.

„Силите за управување со вонредни состојби ќе можеа да ја извршат евакуацијата и на тој начин можевме да ги избегнеме повеќето човечки жртви“, рече тој, а пренесе АФП.

Либија има две ривалски влади, што го отежнува брзиот и координиран одговор на катастрофи.

Секоја влада најави посебни мерки на претпазливост по неодамнешното невреме што предизвика поплави во земјата. Повеќе од 5 300 луѓе загинаа откако пукна брана што доведе до големи поплави во источниот либиски град Дерна.

Градоначалникот на Дерна, Абдулменам ел Гаити, рече дека бројот може да достигне и до 20 000.

„Се проценува дека бројот на загинати во градот може да достигне меѓу 18 000 и 20 000, врз основа на бројот на згради во областите уништени од поплавите“, изјави Гаити за телевизијата Саудиска Ал Арабија.

Најмалку 10 000 луѓе исчезнаа, а десетици илјади беа раселени по катастрофалните поплави предизвикани од невремето „Даниел“.

Министерот за цивилна авијација во администрацијата што управува со источна Либија, Хихем Абу Чкиват, за Ројтерс изјави дека бројот на жртвите може значително да се зголеми бидејќи „морето постојано исфрла десетици тела“.

Од соборувањето на долгогодишниот лидер полковник Моамер Гадафи во 2011 година, Либија е заглавена во конфликти и поделби. Постојат две ривалски влади во земјата – една со седиште во главниот град Триполи на запад и една со седиште во Тобрук на исток.