Извадена и втората црна кутија на Ту-154 од водите на Црното море

Втората црна кутија на авионот Ту-154 е најдена и извадена од водата, соопшти Министерството за одбрана на РФ.

„Пред помалку од половина час е најдена и извадена втората црна кутија на авионот Ту-154“, соопшти Министерството за одбрана на Русија и додаде дека операцијата за пребарување тече непрекинато, пренесува „Интерфакс“.

„На подрачјето на пребарување во моментов се вклучени 45 бродови и пловила, 15 длабоководни апарати, 192 нуркачи, 12 авиони,5 хеликоптери и беспилотна авијација“, изјавија од воениот ресор на Русија.

Министерството исто така соопшти дека на подрачјето на авионската несреќа се пронајдени 15 тела на загинатите и 239 фрагменти од телата на жртвите во трагедијата.

„13 тела и 168 фрагменти се веќе доставени во Москва во Бирото за медицинска експертиза за идентификација и генетско вештачење“, се вели во соопштението.

Од 105 роднини на загинатите се земени примероци од биолошки материјал, потребни за генетско вештачење и идентификација, информира Министерството за одбрана на РФ.

Телевизија „Ѕвезда“ објави видео од работата на нуркачите вклучени во операцијата во водите на Црното море.