Мистериозни линии во руските степи збунија европски астронаут
„Снежен минимализам во Русија. Не можам да ги објаснам овие со километри долги паралелни линии“, напиша Песке под фотографијата објавена на сајтот „Фликр“.
Во коментарите му објаснија дека на снимката е масивниот заштитен шумски појас Белаја Калитва, насаден во средината на минатиот век за заштита на степите на европскиот дел на Русија од суша и суви ветрови, пренесува „Взгљад“.
Шумскиот појас почнува од левиот брег на реката Северски Донец кај селцето Бородинов, а завршува 16 километри јужно од Пенза кај населеното место Новаја Каменка. Вкупната должина на појасот изнесува 708,5 километри, вклучува три паралелни заштитни појаси широки околу 60 метри, распоредени на растојание од околу 350 метри еден од друг. На тој начин излегува дека ширината на заштитниот шумски појас е околу 700 метри.