روحاني د ایراني توغندیو په اړه خبرې له بحث او پوښتنې بهر بللي
حسن روحاني پرون سې شنبه په تهران کې په یوه خبري کنفرانس کې ټینګار وکړ چې د ایران د لېرې واټن ویشتونکو توغندیو هدف هېڅکله تهاجمي نه دی او نه به وي.
ښاغلي روحاني وویل:
"زموږ توغندي زموږ د خپلې دفاع لپاره دي، دفاعي دي او هېڅکله زموږ توغندي د ډله ییزې وژنې د وسلو لپاره هم نه دي جوړ شوي، ځکه موږ اصلاً د ډله ییزې وژنې وسلې نه لرو او دا ډول اټمي او غیر اټمې وسلې ممنوع ګڼو، نو په همدې اساس موږ په دې برخه کې له چا سره خبرې اترې نه لرو."
د فرانسې خبري اژانس د ښاغلي روحانې له خولې وايي چې د واشنګټن او ایران ترمنځ د ستونزو د هواري کیلي د واشنګټن په لاس کې ده چې د نوموړي په وینا، امریکا باید له ګواښ، بندیزونو او فشار څخه لاس واخلي.
د ایران ولسمشر همدارنګه د ایران او د نړۍ د شپږو پیاوړو هېوادونو ترمنځ په ۲۰۱۵ میلادي کال کې د شوي اټمي تړون په اړه بیا ځلي خبرې اترې هم رد کړې.