په ارزګان کې له ۴۱۷ بې ځایه شویو کورنیو سره نغدي مرسته وشوه
د ارزګان ولایت په مرکز ترینکوټ کې نن یکشنبه له ۴۱۷ هغو بې ځایه شویو کورنیو سره نغدي مرسته وشوه، کومې چې په دې ورستویو کې د جګړو له کبله له خپلو سیمو بې ځایه شوې وې.
د دغه ولایت والي محمد شفیق اسدالله سعد د یادو مرستو د وېش پرمهال رسنیو ته وویل چې د ۴۱۷ بې ځایه شويو هرې کورنۍ ته ۱۴زره افغانۍ ورکوي چې په خبره یې، وبه کولای شي چې د یادو کورنیو لومړنۍ اړتیاوې پوره کړي.
نوموړی وايي، له دغو بې ځایه شویو کورنیو سره یاده مرسته د « NRC» موسسې له خوا شوې ده.
که څه هم هغه کورنۍ چې ورسره مرسته شوه، ډېرې خوشحال دي او د ورته نورو مرستو غوښتنه هم کوي.
خو دغلته یوشمېر بې ځايه شوې کورنۍ ادعا کوي چې خیريه موسسې د دوی په نوم راغلې مرستې خپلو خپلوانو ته ورکوي.