کرملین: د ایران او نړۍ د قدرتونو ترمنځ د اټمي تړون بل بدیل نشته
دمیتري پسکوف د دوشنبه په ورځ ویلي:
"روسیه په کلکه د ایران د تړون د دوام غوښتنه کوي. موږ باور لرو چې د هغې بدیل نشته او باید د ټولو اړخونو لهخوا یې درناوی وشي."
ایران په ۲۰۱۵ میلادي کال کې د امریکا، روسیې، چین، بریتانیا، فرانسې او جرمني سره دغه تړون لاسلیک کړ چې له مخې به یې ایران د لویدیځ له لوري د بندیزونو د لېرې کېدو په بدل کې خپل اټمي پروګرام محدودوي.
د امریکا متحده ایالاتو ولسمشر ډونالډ ټرمپ وایي، پهدې تړون کې د ده په وینا ځینې نیمګړتیاوې شته او د تړون اروپایي لورو ته یې د مې تر ۱۲مې نېټې وخت ورکړی چې دغه نیمګړتیا هواره کړي. که داسې ونهشي ولسمشر ټرمپ لهدغه تړونه د واشنګټن د وتلو خبرداری ورکړی دی.
د کرملین ویاند وایي، د روسیې ولسمشر له خپل فرانسوي سیال ایمانوئل مکرون سره د ټیلیفوني مکالمې پر مهال موافقه وکړه چې دغه تړون باید پرځای پاتې شي.