چارواکي: وسله والو تېره شپه په سپین بولدک کې نهه سرتېري وژلي
په سیمه کې د پولیسو یوې باوري سرچینې د ازادي راډیو خبریال ته ویلي چې وسله والو تېره شپه ناوخته د سپين بولدک ولسوالۍ د رباط په کلي کې پر يوه امنیتې پوسته برید کړی، د پوستې ټول سرتېري چې شمېر يې نهو تنو ته رسېده، وژل شوي او د پوستې ټول تجهيزات يې له ځان سره وړي دي.
د کندهار امنیتي چارواکو تر اوسه په دې اړه رسنیو ته څه نه دي ویلي.
طالبانو د برید مسؤليت منلی دی.
سپین بولدک چې ډیورند کرښې ته څېرمه پرته ولسوالي ده، په وروستیو کې ورڅخه د وسله والو بريدونو د زياتوالي خبرونه ورکول کېږي.