په تخار کې د ۲۴ په نوم د عملیاتو هدف د منځنۍ اسیا د جنګیالیو ځپل دي
د دغې قول اردو ویاند محمد حنیف رضایي تېر ماښام ازادي راډیو ته وویل چې دغه وسله وال په بېلابېلو ولسوالیو لکه خواجه غار، خواجه بهاوالدین او ینګي قلعه کې حضور لري.
ده وویل:
"د منځنۍ اسیا هېوادونو جګړه مارو د طالب په قالب کې په دغو ولسوالیو کې ترورېستي فعالیتونه ترسره کوي، خلک هم شکایت لري چې په دې ځای کې د چیچن وګړي، اویغوران، د ازبکستان د اسلامي تحریک غړي او د تاجکستان د جمعیت انصار الله ګوند غړي شته، نو په همدې دلیل عملیات پیل شوي دي."
ښاغلي رضایي زیاته کړه چې د یکشنبې په ورځ د دغو عملیاتو تر پیل وروسته څه باندې لس طالب وسله وال وژل شوي دي.
نوموړي په یادو ولسوالیو کې د بهرنیو جګړه مارو شمېره مشخصه نه کړه.