په فراه کې د ناټو ځواکونو یوه کشفي الوتکه رالوېدلې
د فراه والي محمد شعیب ثابت تېر ماښام ازادي راډیو ته وویل چې دا الوتکه د دوشنبې په سهار په کجګین سیمه رالوېدلې ده، هغه سیمه چې د ده په وینا د وسلهوالو طالبانو تحرکات پهکې دي.
نوموړی وايي:
"کشفي الوتکه وه چې په پشت رود ولسوالۍ کې لوېدلې ده. پهدې سیمه کې طالبانو حضور نه درلود، خو ورته نژدې وو او مخکې تردې چې افغان ځواکونه سیمې ته ورسېږي، هغوی ور ورسېدل."
د فراه والي د الوتکې د لوېدلو دلیل تخنیکي عوارض ښیې، خو نور جزئیات یې ورنهکړل.
تر دې وړاندې وسلهوالو طالبانو ادعا کړې ده چې دغه الوتکه دوی راغورځولې او بدنه یې اوس له دوی سره ده.
د پشت رود ولسوال غوث الدین ازادي راډیو ته وویل چې طالبانو د الوتکې دغه بدنه یوه نامعلوم ځای ته انتقال کړې ده.
په افغانستان کې مېشت ناټو ځواکونو تر اوسه پهدې اړه څه نهدي ویلي.