طارق ارین: داعش ته اجازه نه ورکوو چې افغانستان کې وده وکړي
د افغانستان امنیتي مسؤلین وایي، د داعش په څېر نورو ترهګرو ډلو ته به اجازه ورنهکړي چې په افغانستان کې وده وکړي او نور هېوادونه وګواښي.
د افغانستان د ملي امنیت شورا ویاند طارق ارین دا خبره د امریکایي چارواکو د هغو اندیښنو په غبرګون کې کړې چې وایي، د اسلامي دولت ډلې خراسان څانګه پر امریکاد برید اراده او وړتیا لري.
یو اېس ټوډې «US TODAY» ورځپاڼې د امریکا د یوه استخباراتي مقام له قوله دا څرګندونې پرون کړي دي چې له رسنیو سره د خبرو اجازې نه درلودلو له کبله یې نوم نهدی ښودل شوی.
دغې ورځپاڼې دا هم لیکلي چې د اسلامي دولت ډلې خراسان څانګه پر لویدیځو هېوادونو د برید طرحې لري.
دې ورځپاڼې د امریکا د سنا مجلس د پوځي خدماتو د کمېټې یوه غړي «جک رید» هغه خبرې هم راخېستې چې افغانستان ته د سفر پر مهال یې د داعش وسلهوالو په اړه کړې وې.
یاد امریکایي سناتور ویلي و چې اسلامي دولت ډله هم د شمېر او هم د جنګي تکتیکونو له نظره د پراخېدو په حال کې ده .
په همدې حال کې په افغانستان کې د ناټو لوړ پوړي ملکي استازي «نیکلاس کي» له ازادي راډیو سره په مرکې کې داعش په افغانستان کې یو جدي خطر بللی وو چې په خبره یې باید جدي وګڼل شي.
داعش وسلهوالو په کابل او یو شمېر نورو ولایتونو کې پر عامو خلکو د ځینو خونړیو بریدونو مسؤلیت اخېستی دی.