د اطلاعاتو او فرهنګ وزارت: د جام د څلي د ژغورلو لپاره هڅې کوو
د افغانستان د اطلاعاتو او فرهنګ وزارت وايي چې د جام د څلي د ژغورلو لپاره هڅې کوي.
په غور کې د سخت باران له امله په ډېرو ولسوالیو کې سېلابونه راغلي دي.
د غور د شهرک ولسوالۍ د جام سیمه هم سېلابونو لاندې کړې ده.
د ازادي راډیو خبریال د سیمه یېزو چارواکو په حواله وايي چې د سېلاب اوبه د جام تر څلي رسېدلې او دا تاریخي میراث د ړنګېدو له ګواښ سره مخامخ دی.
د غور والي غلام ناصر خاضع ازادي راډیو ته وویل:
"د افغانستان ولسمشر هم لارښوونه کړې چې له هر امکانه کار واخیستل شي او دا منار له ړنګېډو وژغورل شي."
خو د خاضع په وینا چې سېلاب خامې لارې خرابې کړې او د مرستو رسولو کار له خنډ سره مخامخ دی.
د افغانستان د اطلاعاتو او فرهنګ وزارت پرون د مې په ۲۴مه په خبرپاڼه کې ویلي چې د جام د څلي شااوخوا ته د سېلاب د اوبو لاره بنده شوې ده.
دا څلی د جام دریاب ته نږدې دی چې د هریرود دریاب ته ور بهېږي.
دې تاریخي ځای ته د رسېدلي تاوان د کمولو لپاره خلکو هم مرسته کړې ده.
د جام څلی ۶۵ متره لوړ دی.
دا څلی د ملګرو ملتونو سازمان د نړۍ په فرهنګي میراثونو کې چې له ګواښ سره مخامخ دي، شامل کړي دي.