په امریکا کې د نیول شویو کډوالو له وضعیته د ملګرو ملتونو اندېښنه
د دې ادارې ویاندې روینا شامدساني ویلي چې د ملګرو ملتونو د بشري حقونو عالي کمیشنره میچیل بچیلیت د پناه غوښتونکو او د هغوی د ماشومانو له بنديانېدو او سختو شرایطو ډېره ناهیلې شوې ده.
دې وویل: د ملګرو ملتونو د بشري حقونو عالي کمیشنره په امریکا متحده ایالتونو کې د نیول شویو پناه غوښتونکو او د هغوی د ماشومانو وضعيت سخته ناهیلې کړې، پناه غوښتونکي ماشومان باید هېڅ ونه نیول شي، دا کار به د نړیوالو قوانینو په اساس ظالمانه، غیر انساني او توهینوونکی وي.
تېره اوونۍ د امریکا متحده ایالتونو د کورني امنیت د وزارت له خوا په تکزاس کې د پناه غوښتونکو د توقیف ځایونو عکسونه خپاره شوي وو چې پکې له حده دوه چنده زیات خلک ساتل کېږي.
د متحده ایالتونو ولسمشر ډونالد ټرمپ د ۲۰۲۰ کال ټاکنو په مخه د کډوالو پر ضد یوه سخته تګلاره غوره کړې چې د ګڼو منتقدینو له خوا پرې کلکې نیوکې شوي.
د امریکا ولسمشر ډونالد ټرمپ مخکې دلیل راوړی و چې دغه هېواد ته د ناقانونه کډوالو په خاطر تاوان رسېدلی او دی به یې مخه ونیسي.