چارواکي: سږ به هلمند کې نږدې ۹۰ زره مټریک ټنه انګور تولید شي
د دې ولایت د کرنې او مالدارۍ ریاست د پلان او همغږۍ د پروګرامونو مسؤل رفیعالله قلم نن د سې شنبې په ورځ ازادي راډیو ته وویل چې سږکال به په هلمند ولایت کې نږدې ۹۰ زره مټریک ټنه انګور تولید شي.
ښاغلی قلم وايي، د هلمند ولایت انګور د کیفیت له پلوه ښه دي او له هلمند سربېره د هېواد په يو شمېر نورو ولایتونو کې هم ښه بازار لري.
د نوموړي د معلوماتو له مخې په هلمند ولایت کې په څه باندې شپږ زره هکټاره ځمکو کې د انګورو باغونه دي چې له هر هکټار ځمکې څخه ۱۶ مټریک ټنه انګور راټولېږي.
رفیع الله قلم وايي، په هلمند ولایت کې د بڼوالۍ د ودې او پراختیا لپاره بڼوالو ته روزنیز پروګرامونه نیول کېږي او دا شان ورته د اړتیا وړ امکانات هم ورکول کېږي.